Kum 14 Mi Inawkhlum

lpsvision — Thu, 24 Jun 2010 12:02:45 +0000

Lalpektluanga (14) chu june 24 khan St. Lawrence Bishop chenna In bul thingah inawkhluma hmuh a ni. Lalpektluanga hi Pu Savunga, Zokhawthar ami fapa a ni a, Aizawl Ramthar vengah hian a nute-i, Pi Thuami te inah awmin lehkha a zir a, Ramthar Govt. Middle School a pawl 6 zirlai a ni a, naupang ruakhau tak a ni a, vawi khat chu a zial zu an man ve tawh tihloh chu ruihtheih thil a tih pawh an hre ngai lo a ni.

Lehkha pawh a thiam thei a, pahnihna te a ni thin a, a chak avang hian school ah pawh an hawlh lar hle thin nia thu dawn a ni. June 23 zan khan alo haw lo a, vawiin chawhma dar 10 pelh khan St. Lawrence School bul Bishop House thlang huan Sunhlu kungah alo inkhai hi hmuh a ni ta a, Aizawl PS chuan vawiin chawhma dar 11 vel khan report hi an dawng a ni. Report an dawn veleh Aizawl PS staff te a hmunah kal nghalin thil awmdan an en nghal a, sunhlu kungah hian puanin a inkhai a, thil diklo a awm awm hriat a ni lo a.

Engmah lehkha hnutchhiah pawh a nei lo a, tukkina hmuh anih hian a taksa pawh a khawng vek tawh a ni. Inchhung lamah pawh han inawhhlum duh maina chhan tur boruak a awm hriat ani lo a, hmanni deuh khan Zokhawthar atangin a nu alo zin a, engemaw inhauna deuh chu an nei a, a nu hnenah hian kan inhmuh leh hunah chuan damin kan inhmu tawh lovang a ti nia sawirik te pawh a awm a, mahse a nu biak phak a awm loh avangin engmah thuchiang a awm thei lo a ni.

A nute-i hian a inawhhlum danah hian rinhlelhawm awma a hriat loh avangin Postmortem loh a dil a, a dil ang hian Magistrate in phalsakin june 24 tlai dar 4:30 khan Zokhawthar lam panpui a ni a, a sikul kalna zirtirtu pahnihin an zui chho bawk a ni.

MZP Platinium Jubilee

lpsvision — Tue, 22 Jun 2010 13:23:35 +0000

Mizo Zirlai Pawl chuan Pathian kaihhruaina hnuaiah kum 75 (Platinum Jubilee) alo thleng chho dawn ta a, a puala hun hawn nan ni 22 june 2010 hian MZP chuan Thing a phun dawn a, he hunah hian General Headquarters Executive Committee Members, College Student ‘ Union leh Hnampual zirlaite tel vek tura beisei an ni. He huna kal tur zawng zawng ten thing phun na hmanrua ( Tuthlawh, Thirtiangte leh chem) ken theuh tur a ni a, zing dar 10:00-ah New Civil Secretariat Complex-ah kim vek tur a ni.

Mizo Zirlai Pawl kum 75-na (Platinum Jubilee) hi a theih ang leh remchan dan anga lawm zel tum a ni. Ruahmanna engemawzat siam tawh a ni a, lawmna leh hriatrengna thiltih hrang hrangah MZP hruaitu hlui leh Hnampual hruaitu leh College zirlai leh hruaitu lo ni tawh zawng zawngte inthlahrung hauh lova tel zel turin MZP chuan a ngen in a sawm tak meuh a ni.